Persónuverndarstefna Samtals

talasaman.is

Útgáfa 1.1, drög. Síðast uppfært: 6. september 2026.

Í stuttu máli

Við biðjum um lítið og segjum skýrt hvað við gerum við það.

Við söfnum netfangi, fæðingarári og póstnúmeri. Lóðsar gefa líka upp skóla. Síðar gætum við beðið um símanúmer.
Við söfnum svörum þínum við spurningum Samtalsins, fyrir og eftir samtalið.
Svörin þín verða hluti af opnu gagnasafni sem allir mega nota. Þar fylgja svörunum aðeins póstnúmer, fæðingarár og hringurinn þinn (til dæmis skóli eða vinnustaður). Aldrei netfang, aldrei símanúmer, aldrei nafn.
Við biðjum um leyfi til að hafa samband við þig með tölvupósti og SMS um Samtalið. Stjórnendur hringsins þíns geta líka haft samband.
Við biðjum sérstaklega um leyfi til að skoða hvernig vefurinn er notaður svo við getum bætt hann.
Við seljum ekki upplýsingar um þig og notum þær ekki í auglýsingar.
Þú getur hætt við hvenær sem er og fengið netfanginu þínu eytt.

Það sem hér fer á eftir útskýrir þetta nánar. Ef eitthvað er óskýrt máttu skrifa okkur á [netfang].

1. Hver ber ábyrgð á upplýsingunum?

Ábyrgðaraðili er [Samtal, félag til almannaheilla / sjálfseignarstofnun, kennitala félags], [heimilisfang].

Netfang fyrir spurningar um persónuvernd: [personuvernd@talasaman.is]

Ef við þurfum að tilnefna persónuverndarfulltrúa verður nafn hans og netfang birt hér.

2. Hvaða upplýsingum söfnum við?

Upplýsingar	Hver gefur þær	Til hvers
Netfang	Allir sem skrá sig	Til að skrá þig inn með innskráningarhlekk, minna þig á samtalið og biðja þig að svara aftur eftir það
Nafn	Allir sem skrá sig	Til að heilsa þér með nafni og svo stjórnendur hringsins þíns viti hver þú ert. Nafnið birtist aldrei opinberlega og fer aldrei í opna gagnasafnið
Símanúmer	Valkvætt, ef við biðjum um það	Til að senda þér SMS um staðsetningu, tíma og áminningar, og svo stjórnendur hringsins þíns geti náð í þig
Fæðingarár	Allir	Til að sjá hvernig ólíkar kynslóðir hugsa
Póstnúmer	Allir	Til að sjá hvernig ólíkir landshlutar hugsa og til að finna borð nálægt þér
Hringur	Allir sem tilheyra hring	Hringur er hópurinn sem þú tekur þátt með: skóli, vinnustaður, félag eða borð sem þú stofnar sjálf(ur). Til að skipuleggja daginn og sjá hvernig ólíkir hópar hugsa
Skóli	Lóðsar (leiðbeinendur)	Til að skipuleggja þjálfun og raða Lóðsum á staði
Svör við spurningum Samtalsins	Allir sem svara	Þetta er kjarninn í Samtalinu. Sömu spurningar fyrir og eftir sýna hvernig samtalið hreyfir við fólki
Umræðuefni sem þú vilt ræða	Allir sem svara	Til að velja umræðuefni dagsins
Uppáhalds staðurinn þinn á Íslandi (heiti, hnit og skýring)	Þau sem vilja	Til að sýna samandregið á korti í Samtalinu hvaða staðir eru fólki kærir. Birtist aldrei með nafni eða netfangi
Frjáls texti, hugmyndir og skilaboð til framtíðar	Þau sem vilja	Til að birta á vefnum og geyma fyrir komandi kynslóðir
Tæknilegar upplýsingar (tímastimpill, dulkóðað IP-númer, gerð vafra)	Safnast sjálfkrafa	Til að vefurinn virki og sé öruggur

3. Hvað söfnum við ekki?

Ekki kennitölu. Enginn þarf að sanna hver hann er til að taka þátt.
Ekki kyni, uppruna, trú eða stjórnmálaskoðunum sem sérstökum reitum.
Ekki staðsetningu úr tækinu þínu. Við lesum aldrei staðsetningu símans eða tölvunnar. Póstnúmerið sem þú skrifar sjálf(ur), og uppáhalds staðurinn sem þú velur sjálf(ur) á korti ef þú vilt, er það eina sem við notum.

Ef þú skrifar upplýsingar um þig eða annað fólk í frjálsa textareiti, sjá kafla 5.

4. Til hvers notum við upplýsingarnar?

Við notum þær í þrennum tilgangi og ekki öðrum:

a) Til að halda Samtalið. Skrá þig, raða þér á borð, þjálfa Lóðsa og senda þér spurningarnar aftur eftir samtalið.

b) Til að hafa samband við þig. Senda þér tölvupóst og SMS um staðsetningu, tíma, áminningar og niðurstöður. Stjórnendur hringsins þíns, til dæmis kennari eða Lóðs sem leiðir borðið þitt, geta einnig haft samband við þig út frá tengiliðaupplýsingum þínum, en aðeins um Samtalið.

c) Til að búa til opið gagnasafn þjóðarinnar. Svör allra, merkt aðeins póstnúmeri, fæðingarári og hring, verða gerð aðgengileg öllum sem vilja skoða, rannsaka eða nýta þau. Þetta er tímakapsúla um hvernig fólk á Íslandi hugsaði um landið sitt árið 2026.

d) Til að bæta vefinn. Að skilja hvar fólk stoppar, hvað virkar og hvað ekki. Þetta gerum við aðeins með þínu leyfi, sjá kafla 7.

Lagagrundvöllur vinnslunnar er samþykki þitt samkvæmt 1. tölul. 9. gr. laga nr. 90/2018 um persónuvernd og vinnslu persónuupplýsinga, og a-lið 1. mgr. 6. gr. almennu persónuverndarreglugerðarinnar. Tæknilegar upplýsingar sem eru nauðsynlegar til að vefurinn virki og sé öruggur vinnum við á grundvelli lögmætra hagsmuna.

5. Opna gagnasafnið: hvað fer þangað og hvað ekki

Þetta er stærsta ákvörðunin sem þú tekur með því að taka þátt, svo hér er hún útskýrð nákvæmlega.

Fer í opna gagnasafnið:

Svör þín við spurningum Samtalsins, fyrir og eftir.
Umræðuefnin sem þú valdir.
Frjáls texti, hugmyndir og skilaboð til framtíðar.
Póstnúmerið þitt og fæðingarárið þitt, tengd við svörin.
Hringurinn sem þú tókst þátt með, til dæmis nafn skóla, vinnustaðar eða félags.
Hvort þú tókst þátt sem Lóðs eða þátttakandi.

Fer aldrei í opna gagnasafnið:

Netfangið þitt.
Símanúmerið þitt.
Tæknilegar upplýsingar um tækið þitt.
Neitt sem tengir svörin þín við þig sem einstakling.

Hvernig við pössum að enginn þekkist:

Ef svo fáir svara úr sama póstnúmeri, fæðingarári eða hring að hægt væri að þekkja einhvern, sameinum við hópa (til dæmis í landshluta, fimm ára aldursbil eða "framhaldsskóli á Norðurlandi") áður en gögnin eru birt. Þetta skiptir sérstaklega máli fyrir litla hringi.
Við lesum yfir frjálsan texta og fjarlægjum nöfn, símanúmer og annað sem gæti bent á þig eða annað fólk áður en hann er birtur.
Við biðjum þig um að skrifa ekki nöfn eða persónuupplýsingar í frjálsa textareiti. Reiturinn minnir þig á þetta.

Hvað aðrir mega gera við gögnin:

Gagnasafnið verður gefið út með opnu leyfi sem heimilar öllum að skoða, greina, nýta og deila gögnunum, þar á meðal fjölmiðlum, rannsakendum, skólum og almenningi, hér á landi og erlendis. Þegar gögnin hafa verið gefin út getum við ekki kallað þau til baka frá þeim sem hafa þegar sótt þau.

Hvernig við greinum svörin:

Við notum hugbúnað sem finnur sameiginleg þemu í þúsundum svara og birtir niðurstöður myndrænt á vefnum meðan á deginum stendur. Engar ákvarðanir um þig sem einstakling eru teknar á grundvelli þessarar greiningar.

6. Hverju samþykkir þú?

Þegar þú skráir þig biðjum við um þrjú aðskilin samþykki. Fyrstu tvö eru nauðsynleg til að taka þátt á vefnum, þriðja er valkvætt.

Samþykki 1: Opið gagnasafn (nauðsynlegt til að svara)

Ég samþykki að svörin mín við spurningum Samtalsins, ásamt póstnúmeri, fæðingarári og hringnum sem ég tek þátt með, verði hluti af opnu gagnasafni sem allir mega nota. Ég skil að netfang og símanúmer fylgja aldrei með.

Án þessa samþykkis er ekki hægt að svara spurningunum, því svörin eru tilgangur Samtalsins. Þú getur samt komið á staðinn og tekið þátt í samtalinu við borðið.

Samþykki 2: Samband (nauðsynlegt til að skrá sig)

Ég samþykki að Samtal og stjórnendur hringsins míns hafi samband við mig með tölvupósti og SMS um Samtalið: staðsetningu, tíma, áminningar og niðurstöður.

Við höfum ekki samband um annað en Samtalið og sendum aldrei auglýsingar. Stjórnendur hringsins þíns sjá tengiliðaupplýsingar þínar aðeins meðan þú ert í hringnum og mega aðeins nota þær til að skipuleggja samtalið.

Samþykki 3: Notendagreining (valkvætt)

Ég samþykki að Samtal safni upplýsingum um hvernig ég nota vefinn, án vafrakaka sem fylgja mér á aðra vefi, til að bæta hann.

Þú getur breytt þessu vali hvenær sem er í stillingunum þínum eða með því að skrifa okkur.

Þú getur afturkallað hvert samþykkið sem er, sjá kafla 10. Ef þú afturkallar samþykki 2 getum við ekki lengur minnt þig á samtalið eða beðið þig að svara aftur, en þú getur samt tekið þátt.

7. Notendagreining: hvernig hún virkar

Ef þú samþykkir notendagreiningu söfnum við upplýsingum um hvaða síður eru skoðaðar, hvar fólk hættir í skráningarferlinu og hvaða tæki og vafrar eru notaðir.

Við gerum þetta þannig:

Við notum [heiti greiningartóls] sem er hýst innan Evrópu.
Engar vafrakökur eru settar sem fylgja þér yfir á aðra vefi.
IP-númer eru dulkóðuð áður en þau eru geymd og aldrei tengd við svörin þín.
Gögnin eru aðeins skoðuð samandregin, ekki fyrir einstaka notendur.
Við notum ekki Google Analytics, Meta Pixel eða sambærileg auglýsingatól.

Ef þú samþykkir ekki setjum við aðeins þær vafrakökur sem eru nauðsynlegar til að þú getir skráð þig inn.

8. Hverjir fá aðgang að upplýsingunum?

Innan Samtals: Aðeins þeir sem þurfa þess vegna starfa sinna, bundnir þagnarskyldu.

Stjórnendur hringsins þíns: Sá sem stjórnar hring, til dæmis kennari sem skipuleggur skólann sinn eða Lóðs sem leiðir borð, sér netföng og símanúmer þeirra sem eru í hringnum, ásamt fæðingarári og póstnúmeri. Stjórnendur sjá ekki svörin þín. Þeir samþykkja sérstakar reglur um að nota upplýsingarnar aðeins til að skipuleggja Samtalið og eyða þeim eftir daginn. Ef þú ferð úr hring hverfa upplýsingar þínar úr yfirliti stjórnandans.

Vinnsluaðilar sem hýsa og reka vefinn fyrir okkur, samkvæmt vinnslusamningi:

[Vercel] hýsir vefinn, gagnaver í Frankfurt, Þýskalandi.
[Neon] hýsir gagnagrunninn, gagnaver í Frankfurt, Þýskalandi.
Resend sendir innskráningarhlekki og tölvupósta (netfang, efni og texti póstsins).
Photon (Komoot, Þýskalandi) leitar að stöðum þegar þú velur uppáhalds stað á kortinu. Fær aðeins leitartextann eða hnitið sem þú smelltir á, aldrei hver þú ert.
OpenTopoMap afhendir kortaflísar. Fær IP-númer tækisins þíns og hvaða hluta kortsins þú skoðar, eins og allir kortaþjónar.
[SMS-þjónusta] sendir SMS, ef þú gefur upp símanúmer.
[Greiningartól] ef þú samþykkir notendagreiningu.

Þessir aðilar mega ekki nota upplýsingarnar í eigin þágu.

Opna gagnasafnið fer til allra, eins og lýst er í kafla 5. Það inniheldur aldrei netföng eða símanúmer.

Við afhendum aldrei netföng eða símanúmer til þriðja aðila, nema lög krefjist.

9. Hvar og hve lengi geymum við upplýsingarnar?

Hvar: Öll gögn eru geymd í gagnaverum innan Evrópska efnahagssvæðisins (Frankfurt). Hýsingaraðilar okkar eru með höfuðstöðvar í Bandaríkjunum og lúta þar með bandarískum lögum. Við höfum valið þá vegna þess að gögnin eru geymd innan Evrópu og þeir hafa skuldbundið sig samkvæmt evrópskum reglum um gagnaflutninga. Við endurskoðum þetta reglulega.

Hve lengi:

Upplýsingar	Geymslutími
Netfang og símanúmer	Eytt [6 mánuðum] eftir þjóðardaginn 10. október 2026, eða fyrr ef þú biður um það. Þeim sem vilja fá fréttir af niðurstöðum bjóðum við að staðfesta það sérstaklega áður en tengiliðaupplýsingum er eytt
Aðgangur stjórnenda hringja að tengiliðaupplýsingum	Lokað [30 dögum] eftir þjóðardaginn
Skóli Lóðsa	Eytt með netfangi
Nafn	Eytt með netfangi
Tæknilegar upplýsingar	Eytt innan [90 daga]
Notendagreining	Samandregin gögn geymd, einstakar heimsóknir eytt innan [12 mánaða]
Svör, póstnúmer og fæðingarár	Geymd varanlega í opna gagnasafninu, ótengd við þig, sem tímakapsúla fyrir komandi kynslóðir

Þegar netfangið þitt hefur verið eytt getum við ekki lengur fundið hvaða svör voru þín. Það er meðvituð ákvörðun til að tryggja að gagnasafnið verði aldrei rekjanlegt.

10. Réttindi þín

Á meðan við geymum netfangið þitt getur þú:

Skoðað allar upplýsingar sem við höfum um þig.
Leiðrétt póstnúmer, fæðingarár, símanúmer eða skóla.
Fengið eytt netfangi, símanúmeri og öllu sem tengist þeim. Svörin þín, með póstnúmeri, fæðingarári og hring, verða þá eftir í opna gagnasafninu ótengd við þig, nema þú biðjir sérstaklega um að þeim verði einnig eytt áður en gagnasafnið er gefið út.
Farið úr hring hvenær sem er, og þá sér stjórnandi hringsins þig ekki lengur.
Afturkallað samþykki fyrir sambandi eða notendagreiningu hvenær sem er.
Afturkallað samþykki fyrir opna gagnasafnið fram að útgáfu þess. Eftir útgáfu getum við fjarlægt svörin úr okkar eigin útgáfu en ekki hjá þeim sem hafa þegar sótt gögnin.
Fengið afrit af upplýsingum þínum á tölvulesanlegu formi.

Skrifaðu á [personuvernd@talasaman.is]. Við svörum innan mánaðar.

Ef þú ert ósátt(ur) við hvernig við förum með upplýsingar um þig getur þú kvartað til Persónuverndar, Laugavegi 166, 105 Reykjavík, personuvernd.is.

11. Börn og ungt fólk

Samtalið er fyrir alla aldurshópa og margir þátttakendur eru í framhaldsskóla.

Þau sem eru 13 ára og eldri geta skráð sig sjálf, í samræmi við 10. gr. laga nr. 90/2018.
Þau sem eru yngri en 13 ára geta tekið þátt í samtalinu við borðið en þurfa leyfi forsjáraðila til að skrá sig á vefinn. Skólar og leikskólar sem halda undirbúningsviðburði fyrir yngri börn skila inn niðurstöðum hópsins, ekki einstakra barna.
Við biðjum um nafn við skráningu, líka hjá þeim sem eru 13 ára og eldri, svo hægt sé að heilsa þér með nafni. Nafn barna birtist aldrei opinberlega, fer aldrei í opna gagnasafnið og er eytt með netfanginu.

12. Öryggi

Öll samskipti við vefinn eru dulkóðuð.
Innskráning er með einnota hlekk í tölvupósti, engin lykilorð eru geymd.
Netföng eru geymd aðskilin frá svörum og tengd með innri kóða sem aðeins kerfið sér.
Aðgangur að gögnum er takmarkaður við þau sem þurfa hann og skráður.
Verði öryggisbrestur sem varðar þig tilkynnum við Persónuvernd innan 72 klukkustunda og þér ef hættan er mikil.

13. Breytingar á stefnunni

Þessi stefna getur breyst, sérstaklega á meðan verkefnið er í mótun. Við birtum alltaf nýjustu útgáfu hér með dagsetningu. Ef breytingin skiptir máli fyrir það sem þú hefur samþykkt sendum við þér tölvupóst og biðjum um samþykki að nýju.